Вӱдшор тылзын 25-ше кечынже С. Г. Чавайн лӱмеш калыкле книгагудын краеведений пӧлкаштыже Марий талешке кечылан пӧлеклалтше «Мый улам уныкаже Онарын …» марий йылме дене квест-модыш эртаралтын.

Тушто Йошкар-Оласе 14-ше номеран гимназийын 5-ше классыштыже тунемше-влак модыныт. Квестыш 19 йоча ушнен.

С. Г. Чавайн лӱмеш калыкле книгагудын краеведений пӧлкаштыже актер, Марий АССР-ын сулло артистше да калык артистше, Марий Эл Республикын  Кугыжаныш премийжын лауреатше Андрей Андрианович Андриановын (1939-2010) шочмыжлан – 80 ий темме лӱмеш  («Сценыште – нылле вич ий) книга ончерым чумырымо.

2019 ий вӱдшор тылзын 11-ше кечынже Шернур районысо каныме да тӱвыра рӱдерыште, 1-ше №-ан Шернур кыдалаш школышто кумдан палыме киноактёр да марий поэт Иванов Кирилл Ивановичын – Йыван Кырлан шочмыжлан 110 ий темме лӱмеш «Эртыше да кызытсе саманысе илыш, тӱвыра да туныктымо паша» темылан пӧлеклалтше VI Республик кӱкшытан «Йыван Кырла лудмаш» шанче-практике конференций эртен.

Пленарный заседаний деч ончыч конференцийын участникше-влакым В. М. Васильев лӱмеш йылмым, сылнымутым да историйым шымлыше марий институтын директоржо Евгений Петрович Кузьмин саламлен, Йыван Кырла лудмашын кӱлешлыкшым палемден.

2019 ий 8 апрельыште 16-00 шагатлан С. Г. Чавайн лӱмеш калыкле книгагудын конференц-залыштыже «Марий краевед» клубын 117-ше погынымашыже лиеш. Клуб Театр идалык да М. Шкетан лӱмеш Марий калыкле драме театрын 100 ияш лӱмгечыжлан пӧлеклалтеш.

2019 ий – Россий президент Владимир Путинын увертарымыж почеш Театр идалык. 13 декабрьыште Россий Федерацийысе чыла регионышто Театр идалыкым торжественно почыныт. Марий Элыште тиде пайрем Э. Сапаев лӱмеш опер да балет академический театрыште эртен.