13 февральыште 16 шагатлан С. Г. Чавайн лÿмеш калыкле книгагудын конференц-залыштыже «Марий краевед» клубын черетан погынымашыже лиеш. Тудо кумдан палыме марий шымлызе, туныктышо, мер пашаеҥ, историй шанче доктор, профессор, Россий Федерацийысе кӱшыл школын сулло пашаеҥже Ксенофонт Никанорович Сануковын 85 ияш лӱмгечыжлан да Марий Эл республикын 100 ияш юбилейжылан пӧлеклалтеш.

К. Н. Сануков «Марий краевед» клубым 30 ий утла вуйлатен шоген. Кызыт тудо клубын почётан председательже улеш. Шымлызын шуко пашаже марий кундемын кушкын, вияҥ толмыж дене кылдалтын. Марий калыкын лӱмло еҥ-влакше нергенат К. Н. Сануков шуко книгам возен. 2005 ийыште Ксенофонт Никанорович республикын 85 ияш лӱмгечыжлан пӧлеклалтше «Марийская автономия» лӱман савыктышым луктеш. 2010 ийыште шымлызе ты книгажым уэмден савыкта.

С.Г. Чавайн лӱмеш калыкле книгагудын краеведений пӧлкаштыже поэт, журналист, фронтовик Шадт Булатын (Шаймурат Минлигалиевич Булатов, 1909-1943) шочмыжлан 110 ий темме вашеш «Поэт-патриот» лӱман ончерым чумырымо. Книга ончер декабрь мучаш марте шуйна.

Пагален ӱжына!

2019 ий теле (декабрь) тылзын 17-ше кечынже С.Г. Чавайн лӱмеш калыкле книгагудын «У старт. 55+» проектше негызеш марий кундемнан сылне да кумдан палыме верлажым ужын кошташ кумылан илалше-влак дене М. Шкетан лӱмеш театрыш экскурсий дене мийышна.

Теле тылзын 10-шо кечынже, Марий тиште пайремым палемдыме кышкарыште, Республикысе марий тӱвыра рӱдер «МУНЛО» кумшо уш-акыл марафоным эртарен. Тений тиде таҥасымашке индеш команде чумырген - Морко, Юлсер, Кужеҥер, У Торъял, Шернур, Мари Турек районла гыч да газет ден журнал редакцийлан пашаеҥышт. С.Г. Чавайн лӱмеш калыкле книгагудын «КнигаКудо» командыжат ты модмашке уло кумылын ушнен. Бердинов Д.А., Лебедева И.И., Миниахметова Л.И., Петрова Е.Г., Пчёлкина А.П. да Федорова А.К. шочмо йылме да сылнымут, марий калыкын илыш-йӱлаже да традицийже дене кылдалтше йодыш-влаклан ятыр чын вашмутым пуэныт.