15 апрельыште 11 шагатлан С. Г. Чавайн лӱмеш калыкле книгагудын конференц-залыштыже мурызо Любовь Васильевна Орлован «Кумыл сем» муро сборникшын презентацийже лиеш.

13 апрельыште 15 шагатлан С. Г. Чавайн лӱмеш калыкле книгагудын конференц-залыштыже Советский районысо Кельмаксола кундемын чолга еҥже, краевед, шымлызе, мер пашаеҥ Леонид Никонорович Киртаевын «Юледур» книгажын презентацийже лиеш.

С.Г. Чавайн лӱмеш калыкле книгагудо «Йоҥга Чавайнын сылнымут. Живое слово Чавайна» медиапроектшым умбакыже шуя.

Тений уста поэтын шочмыжлан 135 ий темеш.

Тиде гана «Шошым» сылнымут гыч ужашым колышташ темлена.

С. Г. Чавайн лӱмеш калыкле книгагудо Марий Эл Республикын Тӱвыра, печать да калык-влакын пашашт шотышто министерствыжын полшымыж дене «Йӧратыме книгагудетлан у книгам пӧлекле» республикысе акцийын пашажым кӱкшын аклаш лиеш, мом шонен пыштыме, тӱрыснек шукталтын! Акцийын тӱҥ шонымашыже – кызытсе саманыште вот технологий да электрон информаций ончылно кая гынат, книга ожнысо семынак эреак кӱлешан, шергакан пӧлеклан шотлалтеш. А книгагудыш пуымо книга-влакым ик-кок еҥ гына огыл, а икмыняр еҥ лудаш тӱҥалеш.

9 февральыште С. Г. Чавайн лӱмеш калыкле книгигудын конференц-залыштыже «Марий краевед» клубын черетан погынымашыже эртыш. 2023 ийыште клуб 35 ияш лӱмгечыжым палемдыш.

Клубын 130-шо погынымашыжым клубын председательже Алексей Максимович Клёнов почо. Книгагудын вуйлатышыже Ирина Витальевна Щеглова «Марий краевед» клубын краеведений пашам вияҥдымаште кугу надыржым палемдыш, краеведений пӧлкан пашаеҥже Светлана Евгеньевна Сауляк клубын шочмыжо да вияҥ толмо корныж нерген каласкалыш.

«Йӧратыме библиотекетлан у книгам пӧлекле» республикысе акций умбакыже шуйна. Библиотекылан эн сай пӧлек – книга.

Марий Эл Республикысе тӱвыран сулло пашаеҥже Алексей Максимович Клёнов, Кужеҥер посёлко гыч туныктымо пашан ветеранже Зоя Александровна Кузнецова да марий серызе, журналист, кусарыше, Россий серызе-влак ушемын йыжъеҥже, Марий Эл Республикысе тӱвыран сулло пашаеҥже Юрий Ильич Соловьев акцийышке кумылын ушненыт да книгагудылан шке возымо книгаштым пӧлекленыт.

1775-ше ий 10-шо декабрьыште Санкт-Петербург оласе кевытлаште «Сочинения, принадлежащие к грамматике черемисского языка» лӱман икымше марий книгам ужалаш луктыныт. Тиде книга кызытсе марий тиштын тӱҥалтышыжылан шотлалтеш. Тудым поляк Вениамин Пуцек-Григорович чумырен да книга мучаште тӱжем утла мутан рушла-марла мутерым пуртен.

8 декабрьыште 16 шагатлан С. Г. Чавайн лӱмеш калыкле книгагудын конференц-залыштыже  Марий тиште кечылан пӧлеклалтше «Марий краевед» клубын черетан погынымашыже лиеш. Марий Эл Республикыште Тиште кечым 10 декабрьыште пайремлат. Тиде кечын 1775-ше ийыште Санкт-Петербург оласе кевытлашке «Сочинения, принадлежащие к грамматике черемисского языка» лӱман икымше марий грамматикым ужалаш луктыныт. Тудым Озаҥысе архиепископ Вениамин Пуцек-Григорович чумырен да книга мучашке тӱжем утла мутан рушла-марла мутерым пуртен.

«Ава» деч шерге мут тÿняште уло мо? Уке, очыни, вет кажне айдемылан илышым ава пöлекла. Санденак, авам моктен, поэт, писатель, композитор, мурызо-влак чапле деч чапле почеламутым, оҥай ойлымашым, повестьым, сылне деч сылне мурым возат.

3 ноябрьыште 12 шагатлан С. Г. Чавайн лӱмеш калыкле книгагудын краеведений пӧлкаштыже Марий Эл Республикын сулло сӱретчыже Валерий Александрович Боголюбовын «Кава тӱр» книгажын презентацийже лиеш.

Морко кундемысе Ильинский ялын шочшыжо Валерий Боголюбов ты книгаж дене лудшо деке поэт семын лектын. Южо почеламутшым 1978 ийыштак возымо. Сылнымут корнылаже тудын кӱрышталтше корнан да шонымашан улыт. Почеламут-влакым ойыркалыме знак деч посна возымо, тиде книгам шымленрак лудаш тарата.