2019 ий 12 декабрьыште 15 шагатлан С. Г. Чавайн лӱмеш калыкле книгагудын краеведений пӧлкаштыже «Марий краевед» клубын черетан погынымашыже эртаралтеш. Погынымашыште верысе краевед-влак дене вашлиймаш лиеш. Клубышко Советский район гыч Леонид Никонорович Киратевым, Медведево район гыч Григорий Леонтьевич Ласточкиным да молымат ӱжмӧ. «Марий краевед» клубын вуйлатышыже, краевед Алексей Максимович Клёнов шке шымлыме пашаж дене палдара.

2019 ий 20 ноябрьыште С. Г. Чавайн лӱмеш калыкле книгагудышто Советский район гыч историк-краевед Леонид Никонорович Киртаев дене вашлиймаш эртыш. Тиде кечын чолга краевед 65 ияш лӱмгечыжым палемдыш.

2019 ий шыжа (октябрь)  тылзын 6-шо кечынже С.Г. Чавайн лӱмеш калыкле книгагудын «У старт. 55+» проектше негызеш Марий Элын пайремжылан пӧлеклалтше оҥай вашлиймаш эртыш. Уна-влакым Мосфильмыште марий артист-влак ден пырля сниматлыме «Кто сильнее его» кинофильм дене палдарыме. Фильмын сценарийжым мемнан землякна В. Обухов возен. 1983 ийыште тудым мемнан республикыште: Козьмодемьянскыште, Курык марий районышто, Юрино поселкышто войзымо. Тӱҥ рольым К. Сморигинас, В. Баринов, В. Ивашов да молат модыныт. Эмлызын ӱдыржӧ Юнай Морко кундемеш шочын кушшо Инна Иванова сниматлалтын. Фильмын режиссержо Автандил Квирикашвили марий кундемыште Совет властьын икымше ийлаштыже лийше событий-влакым: тунамсе милицийын пашажым, кукшо игече шогымылан кӧра шужен илымашым почын ончыктен. Тыгак тудо кумда зрительым калыкнан чон ойыртемже, марий калыкын пӱртӱс яндарлык ончылно вуйым савымыже,  йӱлаже дене палдарен.

С. Г. Чавайн лӱмеш калыкле книгагудын краеведений пӧлкаштыже  марий калыкын автономный областьшым ыштыме нерген декретым лукмо кечылан (1920) «Марий Эл – край марийский» книга ончерым чумырымо.

Книга ончер 15 ноябрь марте шуйна.

Пагален ӱжына!