С.Г.Чавайн лӱмеш калыкле книгагудо шке фондшым тӱрлӧ яра книга, журнал-влак дене пойдараш поснак кумылан. Тиде тудын миссийжым шукташ кугун полша – кызытсе да ончыкылык тукымлан книга поянлыкым арален кодаш да шарнашлан ышталтын.

Кугу таум каласена Сергей Тимофеевич Коноплёвлан, книгагудын лудшыжлан, коллекционерлан, шке коллекцийже гыч «Ивер и Телье» тӱнямбал почто марке полиграфий компанийын ныл томан каталог-полшыкшым пӧлеклымыжлан. 

1 февральыште 16-00 шагатлан С. Г. Чавайн лÿмеш кугыжаныш книгагудын краеведений пӧлкаштыже «Марий краевед» клубын 30 ияш лӱмгечыжлан пӧлеклалтше погынымаш лиеш.

«Марий краевед» клуб 1988 ий 28 январьыште книгагудын краеведений пöлкаже пелен шочын. Шке йырже шочмо кундемнам йӧратыше, тудын верч тургыжланыше шанчыеҥ, туныктышо, журналист, писатель, тоштер да книгагудо пашаҥ-влакым, икманаш, творческий шӱлышан интеллигенцийым ушен шога. Икымше кече гыч тӱҥалын тачысе кече марте клубым Марий кугыжаныш университетын профессоржо, историй наука доктор, книгагудын Чаплӱман лудшыжо Ксенофонт Никанорович Сануков вуйлата. 

С.Г. Чавайн лÿмеш калыкле книгагудо тений 140 ияш лÿмгечым палемда. Тидын вашеш Почмо омса кечым да Марий тиште кечылан пӧлеклалтше пайремым теле тылзын 9-ше кечынже эртарен. Мемнан Книга палате пӧлка «Тамгам сÿретлена» мастар-классым эртарен. Кӧ книгагудыш тиде кечын толын, кажныже гаяк тамгам сÿретлаш да тудын мом ончыктымыжым пален налаш вашкен.

9 декабрьыште С.Г.Чавайн лӱмеш книгагудышто лудшо-влаклан Омса почмо кече эртен. Тудо книгагудылан 140 ий темме лӱмеш да Марий тиште кечылан пӧлеклалтын. Тиде пайремыш краеведений пӧлкат ушнен. «Сылнымут караоке» («Литературный караоке») лӱман акцийым эртарен. Пайремын унаже-влак С. Г. Чавайнын «Ото» почеламутшым тӱрлӧ йылме дене лудыныт. Почеламут марий, руш, курыкмарий, татар, чуваш, немыч, англичан, финн, эстон, венгр, туркмен, азербайджан, узбек, украин йылме дене йоҥген.