21 апрельыште 16 шагатлан С. Г. Чавайн лӱмеш калыкле книгагудын конференц-залыштыже «Марий краевед» клубын черетан погынымашыже лиеш. Погынымаш кумдан палыме шымлызе, историй шанче доктор, краевед, Марий АСССР-ысе наукын сулло деятельже, Россий Федерацийысе кӱшыл школын сулло пашаеҥже, Марий Эл Республикысе М. Н. Янтемир лӱмеш Кугыжаныш премийын лауреатше Геннадий Николаевич Айплатовын 85 ияш лӱмгечыжлан пӧлеклалтеш.

16 декабрьыште С. Г. Чавайн лӱмеш калыкле книгагудын краеведений пӧлкаштыже «Марий краевед» клубын 125-ше погынымашыже эртыш. Тиде погынымаш Измаил Варсонофьевич Ефимовын 75 ияш лӱмгечыжлан пӧлеклалте.

Измаил Ефимов – Курыкмарий районысо Порандай ялын шочшыжо, Марий Эл Республикын да Россий Федерацийын сулло сӱретчыже, Марий Эл Республикын калык сӱретчыже, Марий АССР-ын Кугыжаныш премийын лауреатше.

9 декабрьыште Марий тиште кече вашеш С. Г. Чавайн лӱмеш калыкле книгагудын краеведений пӧлкаштыже «Марий тиште тӱня» лӱман площадке пашам ыштен. Площадкыште куд станций вераҥын: «Тиште алан», «Марий писательым пале», «Онарын мландыже», «Родо-тукым тӱня». Нине станцийлаште книгагудын унаже-влак марий калыкын тиштыже, сылнымутшо, историйже, родо-тукым кылже нерген йодыш-влаклан вашмутым пуэныт, «Писын лудына» станцийыште ик минутышто марий да руш йылме дене возымо текстым лудыныт, «Мый улам уныкаже Онарын…» фотозонышто, марий талешкын вургемжым чиен, фотографийым ыштеныт.

С.Г. Чавайн лӱмеш калыкле книгагудылан «Кугарня» газетын пашаеҥже, самырык поэтессе Н. А. Моисеева  «Лышташ велалтме годым» 300 наре экземпляр книгам пӧлеклен. Савыктышым Финляндийысе М.А. Кастрен ушемын полшымыж дене лукмо.