28-ше октябрьыште 14 шагатлан С.Г. Чавайн лӱмеш калыкле книгагудын конференц-залыштыже Советский районысо Кельмаксола кундемын краевед, шымлызе, мер пашаеҥ Леонид Никонорович Киртаевын «Мы достойны наших предков» да «Кум лукан серыш» книга-влакшын презентацийышт лиеш.

Леонид Никонорович – фронтовик-земляк, тылыште тыршыше-влак нерген ятыр книган авторжо. Тудо 40 ий наре шочмо кундемжын историйжым шымла, таче кечылан ятыр книгам савыктен луктын, нунын кокла гыч икмынярже посна ял-влаклан пӧлеклалтыныт.

27 сентябрьыште С. Г. Чавайн лӱмеш калыкле книгагудышто «Марий краевед» клубын 140-ше черетан погынымашыже эртыш. Тудо Марий Эл Республикын сулло художникше Валерий Александрович Чеботкинын 65 ияш лӱмгечыжлан пӧлеклалте.

Клубын вуйлатышыже Алексей Максимович Клёнов художникын илыш да творческий паша корныж дене уна-влакым палдарыш, ача-аваж нерген каласкалыш.

Поро лийже, шергакан лудшына-влак! Таче ме тендам Аркадий Гайдарын «Шокшо кӱ» йомакше дене палыме ыштена.

Шокшо кӱ - Аркадий Гайдарын философий сынан йомакше. Ивашка рвезе  колхоз пакчаш йыштак пурен: олмам поген волташ да шер теммешке кочкын шындаш шонен улмаш.

12 сентябрьыште туныктышо, краевед, мер пашаеҥ, Марий Эл Республикысе тӱвыран сулло пашаеҥже Алексей Максимович Клёнов 65 ияш лӱмгечыжым палемда.

А. М. Клёнов У Торъял районысо Яраҥмучаш ялыште 1960 ий шочын. 1967–1971 ийлаште шочмо ялысе тӱҥалтыш школышто тунемеш, умбакыже пошкудо Шура кандашияш школышто шинчымашым налеш. Школым пытарымек, Оршанке педагогический училищыш тунемаш пура. 1979 ийыште, училищым пытарымек, Н.К. Крупская лӱмеш Марий кугыжаныш педагогический институтын студент ешышкыже ушна. Вич ий физико-математический факультетыште тыршен тунемеш да вузым йошкар диплом дене пытарымек, шочмо Шура школыш пӧртылеш. Самырык туныктышын тыршымыжым ужын, 1985 ийыште школ директорлан шогалтат. Ты пашам ныл ий шукта. Ты жапыштак ялысе клубышто художественный вуйлатыше сомылым шукта.