Шергакан йолташ-влак, ме таче тендам «Вараш ден комбиге-влак» лӱман модыш дене палдарена.

Комбо-шамыч погыненыт,

Тӱрлӧ семын когокленыт,

Икте – эркын, весе – талын,

Тые – узо комбо,

Тые – ава комбо.

Тый – вараш, тыш толынат,

Да комбигым поктылат!

Тыгай шотлеммут полшымо дене вараш, узо комбо, ава комбо ойыралтыт, молышт комбиге лийыт.

Нуно радам дене верланат. Узо комбо ончыко шогалеш, ава комбо мучаште лиеш. Комбиге-влак  узо комбо деч шуйнышо ӱштым кучен шогалыт.

Чумыр ешге погынен, комбо тӱшка пуйто олыкышто коштеш. Тыгутлаште вараш толын лектеш да комбиге-влакым поктылаш тӱҥалеш. Узо комбо игыштым, аваштым аралаш пижеш: кид-шулдыржым шаралтен, нуным авыркала, варашым шӱкедыл покта. Комбиге-влак ачашт деч шуйнышо ӱштӧ гыч ынешт мучышто. А ӱштӧ гыч мучыштат гын, вараш деке куснат. Вараш радам мучашыш кержылтеш гын, тушто игыштым ава комбо арала.

Вараш иктаж комбигым тӱкалта гын, тудыжо тӱшка гыч лектеш, тудым пуйто вараш кочкын лиеш.

Модыш варашын комбиге-влакым кочкын пытарымешкыже шуйна. Вара адак шотлеммут гыч тӱҥалман.

Модса йолташда-влак дене, ешда дене пырля модса!

Вниманию читателей представляем список литературы по представленной теме из фонда Национальной библиотеки имени С. Г. Чавайна:

1. Китиков, А. Е. Марий калык модыш / А. Е. Китиков. – Йошкар-Ола, 1990. – 60 с.
2.  Марий калык модыш-влак = [Марийские народные игры] / С. Д. Архипова ямдылен. – Йошкар-Ола, 2012. – 111 с.
3. Марий калык ойпого : хрестоматий / В. Т. Михайлов ямд. – Йошкар-Ола, 2011. – 358 с.
4.  Марийские народные игры / составитель Архипова Светлана Дмитриевна. – Йошкар-Ола, 2020. – 119 с. : ил.
5. Михайлов, В. Т. Марий калык ойпого = [Устное народное творчество мари] : туныктымо пособий = [учебное пособие] / В. Т. Михайлов. – Йошкар-Ола, 2012. – 310 с.
6. Петухова А. Н. Детский фольклор народа мари / А. Н. Петухова. – Йошкар-Ола, 2004. – 288 с.

Материал подготовила Миниахметова Л. И., ведущий библиотекарь отдела социально-экономической литературы