Шергакан йолташ-влак, ме таче тендам «Мочыла йӧратымаш» лӱман модыш дене палдарена.

Тиде модышым ожно Шорыкйол годым, шинчаш але модаш погынымаште ужаш лийын.

Модыш эртараш пел метр кужытан мочыла ярымым налыт. Мочыла укеште шӱртым, вичкыжрак шпагатым тыгаяк кутыш дене пӱчкеден кучылташ лиеш. Тудо ынже шалане, ынже лугалт манын, кок мучашыжым чаткан гына пидын шындыман.

Модшо-влак кок тӱшкалан шелалтыт. Ик велне – ӱдырамаш-влак, вес мучаште – пӧръеҥ-влак. Ӱдырамаш-влак мочыла ярымым – ик мучаш гыч, пӧръеҥ-влак вес мучаш гыч кучат. Чумырен кылдыме ярым мучашым рудат. Ик ярымын кок мучаштыже улшо ӱдырамаш ден пӧръеҥ калык ончылно шупшалалтшаш улыт.

 Рвезе-влак вашлийыт гын, «Шот – шотан, рат – ратан» манме гай нимат огыл.

А илалше еҥлан калык ончылно шупшалалташ оҥай огыл, тунам ятыр воштылтыш лектеш. Кутырен келшыме почеш, тыгай-влак калык ончылно вес йӧн дене сулалт кертыт: кушталтен-муралтен пуат, мыскарам ойлат. Икманаш, сулык касарымаш мыскара да воштылтышан лийшаш.

Модса йолташда-влак дене, ешда дене пырля модса!