Шергакан йолташ-влак, ме таче тендам «Авызлыше мераҥ ден пий» лӱман модыш дене палдарена.

Тиде модышлан шукырак икшыве кӱлеш. Шотлеммут почеш мераҥым ойырат.

Пылтым-полтым,

Пылтым-полтым,

Сур мераҥ кудал толеш

Ик кастене пакча дек,

Ковыштам кочнеже пеш.

Сур мераҥ, покшеке лек!

Мераҥым ойырымеке, модшо-влак кидым кучен шогалыт, тыге «пакча» лиеш. Оҥгым ыштыше-влак кокла гыч кок модшо, мераҥым пакчаш пурташ манын, кидым колта, тиде – капка, тушеч пураш лиеш. Мераҥ капка гыч пакчаш пура да тӧрштылеш, ковыштам кочкаш пижеш. Мераҥ, авызлышыжла, муралта:

– Еҥ пакчашке пуренам,

Пылтым-полтым тӧрштылам,

Ковыштаже шуко пеш,

Мӱшкыремже темалеш!

Мераҥын тӧрштылын ситарымеке, модшо-влак кенета кычкыралыт:

– Пий толеш!

Мераҥ-влакым поктылеш!

Мераҥ, писынрак кудал,

Осал пий дечын утлал!

Тыгодым мераҥ пакча гыч утлаш тӧча, но капка тӱчылтын. Тунам мераҥ, модшо-влак кокла гыч эн лушкыдо кидкучеман верым кычалын, писын утлаш тӧча. Модшо-влак мераҥлан пакча гыч каяш эрыкым пушаш огытыл. Нуно кидым вашла пеҥгыдын кучен шогышаш улыт. Мераҥ чепым пудыртен кертеш гын, сеҥа. Ок сеҥе гын, оҥгыш шогалеш, олмешыже вес еҥ мераҥ лиеш.

Модса йолташда-влак дене, ешда дене пырля модса!