Шергакан йолташ-влак, ме таче тендам «Агыше ден озан ковышта-влак» лӱман модыш дене палдарена.

Ужар шаршудышто але яндар кӱвар ӱмбалне модаш лиеш. Икмыняр йоча ковышта лиеш. Нуно мӱшкыр ӱмбаке возын, вуйыштым да йолыштым кӱшкыла нӧлтен кият. Ик йоча оза рольым ончыкта. Оза «ковышта-влакын» вераҥме пакча йыр «печым печа» – пелйола тӧрштылын, икмыняр йырым ышта да мура:

– Шӧртньӧ печым печем,

«Шолыштшо ынже пуро» манын,

Шортньӧ печым печем,

«Шолыштшо ынже пуро» манын.

Пурыжо-пурыжо,

Мый тудым садак кучем!

Оза кая. Шолыштшо толеш. Тудо иктаж икшывым ойыра да вуйжым, йолжым кок кидше дене ӱлыкӧ темдал онча. Йоча шкенжым тӧр ок кучо гын, йолжо але вуйжо ӱлыкӧ темдалалтеш гын, шолыштшо тыгай вийдыме «ковыштам» огеш шолышт, тыге манеш:

– Ой, тидыже могай шукшӧ «ковышта»! Тыгайже мылам ок кӱл!

Кудо икшыве патыррак, тудым налеш, да ӧрдыжкӧ, шке кашакше деке, вӱден наҥгая. Оза толеш да манеш:

– Охо-хо-хо, шолыштшо ик «ковыштам» шолыштын аман, ынде Ший печым печышаш.

Оза пелйола йыр тӧрштылын мура:

– Ший печым печем,

«Шолыштшо ынже пуро» манын,

Ший печым печем,

«Шолыштшо ынже пуро» манын.

Пурыжо-пурыжо,

Мый тудым садак кучем!

Оза кая. Шолыштшо толеш. Тудо адак иктаж икшывым ойыра да ик эн чапле «ковыштам» «шолыштын» наҥгая.

Оза толеш да манеш:

– Охо-хо-хо, шолыштшо эше ик чапле «ковыштам» адак шолыштын аман, ынде Кӱртньӧ печым печышаш.

Кӱртньӧ печым печем,

«Шолыштшо ынже пуро» манын,

Кӱртньӧ печым печем,

«Шолыштшо ынже пуро» манын.

Пурыжо-пурыжо,

Мый тудым садак кучем!

Тыге шолыштшо «ковыштам»  шолыштеш да шолыштеш. Кунам шолыштмо «ковышта-влак» да киен кодшо «ковышта-влак» иктӧр лийыт (мутлан, тыштат-туштат кум еҥ), кок кашак куржын ӱчашаш тӱҥалеш. Кӧ эн ондак куржын толеш, тудо оза лиеш, а кокымшо – шолыштшо. Почеш кодшо-влак «ковышта» рольым модыт.

Модса йолташда-влак дене, ешда дене пырля модса!