БИБЛИОТЕКАРЬ ТЕМЛА. Антуан де Сент-Экзюпери «Изи принц»

22.09.2022 | 70 просмотра(ов)

Антуан Мари Жан-Батист Роже де Сент-Экзюпери — француз писатель, профессионал летчик.
Авторын илышыштыже кок чон йӧратымашыже лийын. Тиде авиаций ден литератур. Лач сылнымут саскажак тудым тӱня мучко чапландарен. Антуан де Сент-Экзюпери икмыняр произведенийым возен, но тӱнямбал чапым тудлан «Изи принц» повестьше конден. Писательын илышыштыже тӱрлӧ оҥай событий-влак лийыныт. Автор чонжо дене романтик да философ лийын, тудо моткоч оҥайын пӱртӱсыштӧ улшо явлений-влак нерген класкален моштен да уло тӱням аралаш ӱжын шоген.
«Изи принц» повесть ош тӱням 1943 ийыште ужын. Книгам автор шке сӱретше-влак дене сӧрастарен. Повесть икымше корнылаже денак лудшым ӧрыктара, лудаш кумылаҥда. Кажне йоча юзо тӱнялан ӱшана, садланак Изи принцын каласкалымыже нунылан лишыл.
Кугыеҥ-влакланат роман-притче пайдале. Тудо тургыжландарыше йодышлан вашмутым лудшылан шке шӱм-чонышто кычалаш темла. Повесть уло чон дене йӧратен да келшен мошташ, илышыште сай ден осалым ойырен шогаш, шуктымо пашалан мутым кучаш туныкта.
Повесть Антуанын йолташыже Леон Вертлан пӧлеклалтын. Леон Верт – сар жапым чытен лекше еврей писатель, журналист, критик.

«Тиде изирак книгамым кугыеҥлан пӧлелымемлан йоча-влак тек мылам огыт ӧпкелалт. Шкем пыдалашем маннам: тиде кугыеҥже – мыйын эн сай йолташем. Да эше: тудо тӱняште чылажымат, эсогыл йочалык книгамат, умыла. Да, пытартышлан, тудо Францийште ила, а тушто кызыт шужен жап да йӱштӧ шога. Тудлан моткочак шыматыме кумыл ок сите. Тыге ойлымем мыйым пыдал ок керт гын, тугеже мый тиде изирак книгамым тудо рвезылан пӧлеклем, могай лийын ала-кунам мыйын кызытсе кугыеҥ йолташем. Вет чыла кугыеҥат ондакше йоча лийын, тольык шагалже тидын нерген шарна. Тыгеракын, пӧлекмутемым мый тӧрлатен серем: ала-кунам изи лийше Леон Вертлан»


Антуан де Сент-Экзюперин «Изи принц» повестьшым марий йылмыш Марий Элын калык поэтше Геннадий Сабанцев-Ояр кусарен.
 

Уверым краеведений пӧлкан библиотекарьже А. В. Иванова ямдылен

Mari