Шергакан йолташ-влак, ме таче тендам «Пледыш ылыжеш» лӱман модыш дене палдарена.

Модшо-влак оҥго семын йыр шогалыт. Покшеке кум-ныл еҥ верлана. Оҥго йыр шогышо-влак мурат, а покшелне улшышт мурышто мо нерген ойлалтмым койышышт дене ончыктат. Модшо-влак мурат.

Моло калык семынак марий калыкынат тӱрлӧ модышыжо шуко уло. Кӧ модыш-влакым шонен луктын? Молан? Вашмут икте: нуным калык паша йыжыҥешыже шочыктен, курымла мучко пужарен да чаткаҥден, илышыжлан келыштарен.

Изи икшыве, самырык да кугыеҥ, модыш деке шӱмаҥын, шочмо йылмыжым, шочмо кундемжым йӧраташ тунемеш, тыгак шке кап-кылжым да уш-акылжым шуарен шога.

Ӱярня пайрем – марий калыкын ик эн йӧратыме да вучымо пайремже, пӱртӱсын ылыжме татше. Ӱярня –телым ужатыме да шошым вашлийме пагыт, родо дене вашлиймаш, унала коштмо жап.

Имне дене кудалыштмаш Ӱярня пайремыште кугу верым эреак налын шоген. Ожныжо, имне пӱгыш яндар йӱкан оҥгырым сакен, ял йыр оҥгыр йӱкым луктын, мурен-шӱшкен кудал савырнымаш калыкын илыме верже гыч осал вийым лӱдыктен колтымашым ончыктен.

У ий – кажне икшывылан кугу куан. Нунылан тудо мондаш лийдыме лийже манын, тӱрлӧ таҥасымашым, модышым эртараш йӧра. Телым лум йырваш кия. Садлан кажне йочалан лум дене кылдалтше модыш оҥайла чучеш.

Теве Йӱштӧ Кугызан мешакше гыч пӧлекым налаш манын, тыгай модыш келшен толеш. Йоча-шамыч да кугыеҥ-влакат оҥгыш шогалыт. Икте-весылан кагаз але куэм гыч ыштыме «лум чумыркам» пуэдат.