Таче кече марте Сергей Григорьевич Чавайн нерген шукын возеныт. Туге шоналташ лиеш, пуйто илыш ден творчествыжын чыла йыжыҥлажым шымлен налме. Но тиде тыге огыл. Икмыняр ий дене петырымаште кийыше ятыр архивный фондым ынде почмо, адакше мемнан ончалтышнат весемын. Чыла тидыже писательын илыштыштыже лийше шуко савыртышым у семын радамлаш йӧным пуа.

Ачажын пӱрымашыжым рашемдаш Юрий Чавайнын йодын возымыжлан 1959 ий 16 апрельыште вашештеныт, пуйто Сергей Григорьевич Чавайн эрык деч посна илыме верлаште 1942 ий 16 октябрьыште вуйдорыкыш вӱр логалме дене колен. Шонен лукмо тиде фактым Йошкар-Оласе загс тудо ийынак 15 августышто регистрироватлен. Тиде шоя датым вара чыла изданийыш пуртымо да писательлан Йошкар-Олаште Чавайн бульвареш 1978 ийыште шындыме памятникеш серыме. 1988 ий 30 апрельыште гына Йошкар-Ола загс Сергей Григорьевичын колымо жапшым чын возен, да памятникын постаментыштыже улшо йоҥылышым классикын шочмыжлан 100 ий темме вашеш тӧрлатыме.

Газетлык статьялам писатель утларакше «Кыргори Сергей» лӱмпале дене печатлен. Тыгак «Чын марий», «Марий», «Зуда» да моло псевдонимым кучылтын, кокланже подпись олмеш ик буквам гына (Ч.) шынден. Газет пашаште улмыж годым Сергей Чавайн тӱрлӧ экшык ваштареш «шке семынже чот кучедалаш пиже, – возен 1935 ийыште В. Мухин-Сави. – Ме коктын Салтыков-Щедринын стиль дене «илыш порок-шамычым» поньыжаш тӱҥална. Перона йымач класс тушман тӱшка эре тӱжвак лектын шогыш. «Зуда» (Чавайнын псевдонимже) пеш шуко «едкий» статььям серыш».

2017 ий октябрьыште  Калыкле книгагудышто С.Г. Чавайнын сылнымут пӧлемжым почмаш республикынан тӱвыра илышыштыже келге да кӱлешан кышам коден.

Тиде пӧлем сылнымутым йӧраташ да марий писатель ден поэт-влакым шарналташ кумылаҥда.