Волгыдын йӱлышӧ тул

16.09.2019 | 54 просмотра(ов)

2019 ий 12 сентябрьыште Марий Эл Республикын Кугыжаныш архивыштыже «Летописец музыкальной жизни Марий Эл» лӱман йыргешке ӱстел эртыш. Тудо кумдан палыме музыковед, Россий Федераций да Марий Эл Республикысе тӱвыран сулло пашаеҥже Роза Вениаминовна Артищеван 85 ияш лӱмгечыжлан пӧлеклалте.

Роза Вениаминовнам саламлаш Марий Эл Республикын тӱвыра, савыктыш да калык паша шотышто министрын алмаштышыже Александр Николаевич Луничкин, Кугыжаныш архивын вуйлатышыже Александр Михайлович Одинцов, Марий Эл Республикын композитор ушемын вуйлатышыже Валерий Дмитриевич Кульшетов да молат погыненыт ыле. С. Г. Чавайн лӱмеш калыкле книгагудын пашаеҥже-влак музыковедын творчествыж дене кылдалтше докладым ямдыленыт.

Роза Вениаминовна Артищева Марий Эл Республик, Шернур посёлкышто 1934 ий 2 сентябрьыште партий пашаеҥмыт ешыште шочын. Йошкар-Оласе 2-шо номеран пашазе молодёжь школым пытарен, музыкальный училищыште тунемын. Вара корныжо Озаҥ олашке шуйналтын, кугыжаныш консерваторийыш конден. 1960 ийыште, «музыковед» специальностьым налын, И. С. Палантай лӱмеш Йошкар-Оласе музыкальный училищыш туныкташ толын, сулен налме канышыш лекмешкыже, туштак тыршен. Россий композитор ушем член. Кум шӱдӧ утла наре статьяже газет ден журналлаште савыкталтын. Индеш книган авторжо.

Роза Вениаминовна Артищева личный фондшым Кугыжаныш архивын фондышкыжо кусарен. Тыште тудын фондшо курымеш аралалташ тӱҥалеш.

Mari