Шокшо-шолшо шӱман Алеко

24.04.2018 | 72 просмотра(ов)

2018 ий 26 апрельыште 15 шагатлан С. Г. Чавайн лӱмеш калыкле книгагудын краеведений пӧлкаштыже «Марий краевед» клубын черетан погынымашыже лиеш.
Клубын 115-ше погынымашыже журналист, прозаик, мер пашаеҥ Алексей (Алеко) Михайлович Юзыкайнын 75 ияш лӱмгечылан пӧлеклалтеш. «Ямде лий» газет редакцийыште да краеведений пöлкаште ыштыше пашаеҥ-влак Алексей Михайловичын творчествыжым шымлыше, родо-тукымжо, йолташыже, колегыже-влакым пагален ÿжыт.
Алексей Михайлович Юзыкайн Башкортостан Республик кызытсе Краснокам районысо Чормак ялеш 1943 ий 20 апрельыште шочын. Верысе школ деч вара шым меҥге тораште улшо Арлан кыдалаш школышто тунемын. 1961 ийыште комсомол путёвко дене Стерлитамак оласе химзаводым чоҥымашке каен. Вес ийжылан армийыш налыныт: кум ий Тихоокеанский флотышто служитлен. Умбакыже Озаҥ кугыжаныш университетын историй факультетышкыже тунемаш пурен. Кум талук тушто тунеммеке, 1968 ийыште заочный отделенийыш кусна. Морко районысо «Колхозная правда» (кызыт «Морко мланде») газетын пашаеҥже лиеш. 1969 ий март гыч «Ямде лий» газетыште тырша. Ончыч ответственный секретарьлан, вара редакторлан шогалтат. Тудын чот тыршымыжлан кӧра 1977 ий апрельыште «Ямде лий» газетын посна редакцийже шочеш. А 1986 ийыште «Пионер йӱк» (кызыт «Кече-Солнышко») йоча журналым лукташ тӱҥалеш. Лу талук гыч — «Родничок» лӱман газетын тӱҥ редакторжо. 2002 ийыште угыч «Ямде лийыш» пӧртылеш. Тудак «Марла календарьлан» кокымшо шӱлышым пуа.
Мер пашаеҥ семынат Алексей Михайлович пале кышам коден. «У вий», «Марий ушем» организацийлам да Мер Каҥаш толкыным почаш да нунын пашаштым вияҥдаш шагал огыл вийжым пыштен. Колумб лудмашынат кресачаже — тудак.
«Лудыш аршаш» (1978), «Пушеҥте пушеҥгылан эҥерта» (1985), «Марий... Кӧ ме улына» (1993) да «Юзо тӱня — Волшебный мир» (2002) книгаже-влакат шке лудшыштым муыныт.
Россий журналист ушем член. 1983 ийыште МАССР Верховный Совет Президиумын Чап грамотыж дене палемдалтын.
Ӱмыржӧ командировкышто улмыж годым Киров область Малмыж районысо Кетек ялеш 2004 ий 15 майыште кӱрылтын...
Алексей Михайлович эреак кожмак, самырык шӱм-чонан, илышлан куаныше лийын. Тудын ушан-шотан шомакше, кумда шинчаончалтышыже, тӱняумылымашыже эре тунемаш, ончыл радамыште шогаш, объективный да принципиальный лияш туныктен.

Краеведений пӧлкаште «Шокшо-шолшо шӱман Алеко» лӱман книга ончерым чумырымо.
Пагален ӱжына!

Mari