Шочмо йылмын мурызыжо

05.11.2019 | 50 просмотра(ов)

2019 ий 31 октябрьыште С. Г. Чавайн лӱмеш калыкле книгагудын конферернц-залыштыже «Марий краевед» клубын 118-ше погынымашыже эртыш. Тудо журналист, краевед, Марий Эл Республикын С. Г. Чавайн лÿмеш кугыжаныш премийын лауреатше, Марий АССР-ысе тÿвыран сулло пашаеҥже Гельсий Зайниевич Зайниевын 80 ияш лÿмгечыжлан пöлеклалте.

Клубын вуйлатышыже Алексей Максимович Клёнов погынымашым почо, республикыште краеведений пашан шукталт толмо нерген ойлыш. Марий Эл республикын тӱвыра, печать да калык-влакын пашашт шотышто министрын алмаштышыже Михаил Иванович Матвеев юбилярым саламлыш, С. Г. Чавайн лӱмеш книгагудын директоржо Ирина Витальевна Щеглова таумутым кучыктыш. «Эрвел марий» ансамбль Гельсий Зайниевым муро дене саламлыш.

Марий книга издательствын вуйлатышыже Юрий Ильич Соловьёв, «Ончыко» журналын тӱҥ редакторжо Игорь Геннадьевич Попов, Марий Мер Каҥаш вуйлатышын икымше алмаштышыже, шымлызе, журналист Валерий Александрович Мочаев, пырля пашам ыштыше йолташыже-влак юбилярлан шуко поро мутым ойлышт.

Лÿмгече касыште Г. З. Зайниевын «Шӱм-чон воштончыш» лӱман у книгажын презентацийже лие. Тудо ты книгам калыкнан культур илышыштыже кугу пайрем – М. Шкетан лӱмеш Марий национальный театрын ик курымаш юбилейже вашеш ямдылен.

Mari