Шочмо мланде деч кумылым налын…

10.02.2020 | 211 просмотра(ов)

13 февральыште 16 шагатлан С. Г. Чавайн лÿмеш калыкле книгагудын конференц-залыштыже «Марий краевед» клубын черетан погынымашыже лиеш. Тудо кумдан палыме марий шымлызе, туныктышо, мер пашаеҥ, историй шанче доктор, профессор, Россий Федерацийысе кӱшыл школын сулло пашаеҥже Ксенофонт Никанорович Сануковын 85 ияш лӱмгечыжлан да Марий Эл республикын 100 ияш юбилейжылан пӧлеклалтеш.

К. Н. Сануков «Марий краевед» клубым 30 ий утла вуйлатен шоген. Кызыт тудо клубын почётан председательже улеш. Шымлызын шуко пашаже марий кундемын кушкын, вияҥ толмыж дене кылдалтын. Марий калыкын лӱмло еҥ-влакше нергенат К. Н. Сануков шуко книгам возен. 2005 ийыште Ксенофонт Никанорович республикын 85 ияш лӱмгечыжлан пӧлеклалтше «Марийская автономия» лӱман савыктышым луктеш. 2010 ийыште шымлызе ты книгажым уэмден савыкта. Книгаште Марий автономный областьын шочмыжо ончыкталтеш. Тыгодым элнан тиддеч ончычсо историйже, Руш кугыжанышыш ушнымыжо да тудын пелен умбакыже вияҥ толмо корныжо лудшын шинча ончылныжо эрта. Шымлыме пашаште шуко тÿрлö источникым кучылтмо. Шочмо элын историйжым палаш, ожно лийше тÿрлö событийлан чын акым пуаш манын, калыкнан эртыме корныжым кызытат уэш ончен-шымлен лекташ уто огыл. Тидын шотышто «Марийская автономия» книга пеш кугу полышым пуэн кертеш. 

«Марий краевед» клубын погынымашышкыже К. Н. Сануковын тунемшыже, шымлызе-историк, краевед, туныктышо, студент, радио да телевидений пашаеҥ-влакым ӱжмӧ.

Кумылан-влакым пагален ӱжына!

 

Материалым краеведений пӧлкан вуйлатышыже Светлана Евгеньевна Сауляк ямдылен.

Mari