С.Г. Чавайнын сылнымут пӧлемже у вашлиймашке ӱжеш

07.03.2018 | 599 просмотра(ов)

2017 ий октябрьыште  Калыкле книгагудышто С.Г. Чавайнын сылнымут пӧлемжым почмаш республикынан тӱвыра илышыштыже келге да кӱлешан кышам коден.

Тиде пӧлем сылнымутым йӧраташ да марий писатель ден поэт-влакым шарналташ кумылаҥда.

Тыште чылажат XX курымын 30-шо ийлажым ушештара: книга шкаф, ӱстел, шӱштӧ диван.

Ик велым - «Чавайнын лӱмжӧ калык шӱмыштӧ» ужаш, тышке писательын лӱмжым нумалше верлам фото дене вераҥдыме.

Книга шкафлаште С.Г. Чавайнын сылнымут произведенийлаже (тыгак публицистике, кусарыме пашаже), тудын нерген возымо книга-влак улыт.

Вес могырым - «Тукым пушеҥге» - Сергей Григорьевичын илышыже, ешыже дене палдара.

Сылнымут пӧлемыште тунемше, студент, туныктышо, книгагудын лудшыжо, республикынан унаже-влаклан экскурсий эртаралтеш. 2017 ий октябрь-декабрь тылзылаште чылаже 340  еҥ сылнымут пӧлемыште лийын.

С.Г. Чавайн лӱмеш калыкле книгагудо сылнымут пӧлем дене палыме лияш кажне кумылан еҥым пагален ӱжеш. Экскурсий-влак марий да руш йылме дене эртаралтыт.

 

Экскурсий шотышто йодыш-влакым тыгай телефон дене рашемдаш лиеш:

56-60-27 – краеведений пӧлка;

45-29-11 – шуэн вашлиялтше книга пӧлка;

64-15-95 – Виноградова Татьяна Викторовна, директорын алмаштышыже

Mari