Пӧлеклан – журнал

05.01.2020 | 270 просмотра(ов)

У ий водын С. Г. Чавайн лӱмеш калыкле книгагудо 320 экземпляр «Марийский мир – Марий сандалык» лӱман журнал дене пойдаралте. Тыгай пӧлекым «Марийский мир – Марий сандалык» журналын тӱҥ редакторжо Валерий Александрович Мочаев ыштыш.

2019-ше ий 14 телыште Сургут олаште чумыр Югра гыч марий-влак погыненыт. Амалже – 2020-ше ий 10-11 вӱдшор тылзын Йошкар-Олаште эртаралтше 11-ше марий погынышко делегат-влакым сайлымаш. Марий калыкын  ожнысо, кызытсе да ончыкылык илышыж нерген Йылмым, литературым, искусствым шымлыше марий науко институтын директоржо, историй науко кандидат, Кугыжаныш погынын депутатше Евгений Кузьмин ден журналист Анатолий Титов журнал лаштыкыште каласкалат.

Тений финно-угор писатель-влакын «Литература в условиях диаспоры» 15-ше конгрессше эртаралтын. Журналыште поэт Зоя Дудина «Черемисы-поэты…» статьяже дене лудшо-влакым палдара.

Сергей Шанчара Малмыж районыш миен коштмыж нерген оҥай материалым савыктен.

Марий АССР-ысе тӱвыран сулло пашаеҥже, М.Кастрен лӱмеш ушемын, С.Чавайн лӱмеш кугыжаныш, Я.Ялкайн лӱмеш премий-влакын лауреатышт, «Идалыкын книгаже» конкурсын ныл гана лауреатше, журналист, краевед, публицист, критик Гельсий Зайниевич Зайниев 2019 ий 29 шыжаште 80 ийым темыш. Тудын илыш корныжо, пашаже нерген журналист да писатель Мария Илибаева журнал лаштыкыште каласкала.

Марий Элыште веле огыл, моло кундемыштат илыше марий-влакын илышыштым, пашаштым, лектын шогышо йодышыштым почын пуышо журнал дене С.Г.Чавайн лӱмеш калыкле книгагудышто палыме лияш йӧн уло. Шуко ужашыже республикнан книгагудылашкыже колталтыт.

Mari