«Мый йӧратем родной элемым…»

22.11.2019 | 45 просмотра(ов)

2019 ий 20 ноябрьыште С. Г. Чавайн лӱмеш калыкле книгагудышто Советский район гыч историк-краевед Леонид Никонорович Киртаев дене вашлиймаш эртыш. Тиде кечын чолга краевед 65 ияш лӱмгечыжым палемдыш.

Вашлиймаште Леонид Никоноровичын кок книга презентацийже лие: «Письма, опалённые войной» да «Кум лукан серыш» («Треугольные письма»).

Юбилярым саламлаш родо-тукымжо, пошкудыжо, книга-влакын геройышт толыныт. Этнограф, историй наукын кандидатше Никандр Семёнович Попов шуко поро мутым краеведын пашаж нерген ойлыш. «Марий краевед» клубын вуйлатыше, Кугыжаныш архивын пашаеҥже Алексей Максимович Клёнов Л. Н. Киртаевын ыштен шогымо пашажлан кугу акым пуыш, умбакыжат у книга-влакым лукташ темлыш. С. Г. Чавайн лӱмеш калыкле книгагудын вуйлатышыже Ирина Витальевна Щеглова юбилярым саламлыш, «Книгагудын почётан лудшыжо» лӱман билетым кучыктыш.

Краеведений пӧлкан пашаеҥже-влак Л. Н. Киртаевын творчествыжлан пӧлеклалтше «Краевед-энтузиаст»  книга ончерым чумыреныт.

Вашлиймаш поро, шокшо кумыл дене эртыш.

Кугу тау, Леонид Никонорович, кӱлешан сомылым ыштен шогымыланда, шонымашда илышыш шыҥдаралтше, таза да пиалан лийза! Пашада ушнен шогыжо!

Mari