Марий театр нерген – С. Г. Чавайн лӱмеш книгагудышто

15.04.2019 | 161 просмотра(ов)

2019 ий вӱдшор тылзын 8-ше кечынже С. Г. Чавайн лӱмеш калыкле книгагудын конференц-залыштыже «Марий краевед» клубын 117-ше погынымашыже эртыш. Клуб Театр идалык да М. Шкетан лӱмеш Марий калыкле драме театрын 100 ияш лӱмгечыжлан пӧлеклалте.

Клубын вуйлатышыже Алексей Максимович Клёнов погынымашым почо, республикыште краеведений паша нӧлталалтым палемдыш.

Краеведений пӧлкан вуйлатышыже Светлана Евгеньевна Сауляк Марий Эл республикыште пашам ыштыше театр-влак нерген каласкалыш, презентацийым ончыктыш. Театровед Наталия Ивановна Кульбаева «Йошкар-Ола театральная» фестивальыште сеҥыше-влакым палемдыш. Вӱдшор тылзын 24-ше кечынже МАССР-ын  калык артистше Андрей Андрианович Андрианов, ила гын, 80 ияш лӱмгечыжым палемда ыле. Наталия Ивановна артистын театрыште модмо жапшым порын шарналтыш, илыш корныжым каласкалыш.

2019 ийыште М. Шкетан лӱмеш Марий калыкле драме театр 100 ияш лӱмгечыжым палемда. Марий Эл республикын сулло сымыктыш пашаеҥже, театрын художественный вуйлатышыже Василий Александрович Пектеев марий театрын вияҥ толмо корныж нерген ойлыш, театрлан могай нелылык дене вашлияш логалмым палемдыш, марий йылмым арален кодымо нерген чоным почын каласкалыш.

Россий Федерацийын сулло сымыктыш пашаеҥже, Марий самырык театрын художественный вулатышыже Олег Геннадьевич Иркабаев-Этайн театрын кушмо да вияҥ толмыж нерген каласкалыш. Тудо тыгак Андрей Андрианович Андриановын татар драматург Т. Миннатулинын «Альмандар из Альдермуша» пьесыж почеш шындыме «Чодыраял Элыксандр» спектакльыште тӱҥ рольым модмыж нерген порын шарналтыш. Тиде роль артистлан пытартыш лийын, пьесын авторжо артистын модмыжым кӱкшын аклен, Марий самырык театр дене пеҥгыде кылым кучен.

Клубын погынымашышкыже М. Шкетан лӱмеш Марий калыкле драме театрын артистше-влак Марина Почтенева, Алина Егошина, Светлана Филиппова да Иван Соловьёв уло кумылын ушненыт. Нуно Йыван Кырла да Марий театрлан пӧлеклатше почеламут-влакым лудыныт, марий муро-влакым йоҥгалтареныт.

Театр идалыклан пӧлеклалтше «Марий краевед» клубын погынымашыже поро кумылын эртыш. Марий театр умбакыжат вияҥаш, кушкаш, марий калыкым у спектакль-влак дене куандараш тӱҥалеш да книгагудына дене кылым ок йомдаре манын ӱшанен кодына.

Mari