«Марий краевед» клубын 116-шо погынымашыже лиеш

05.02.2019 | 538 просмотра(ов)

2019 ий 7 февральыште 16.00 шагатлан С. Г. Чавайн лӱмеш калыкле книгагудын краеведений пӧлкаштыже «Марий краевед» клубын 116-шо погынымашыже лиеш. Вашлиймаш поэт, журналист Михаил Иванович Якимовын 90 ияш лӱмгечыжлан пӧлеклалтеш. Якимов Михаил Иванович 1929 ий 14 январьыште Параньга район Янгетсолаште шочын. Ондак шке ялысе тӱҥалтыш школым тунем пытарен, вара шке шинчымашыжым Матародо кыдалаш школышто нӧлтен.

Пашам ышташ 1946 ийыште тӱҥалын, кыдалаш школым тунем лекмеке, ик жап библиотекарьлан ыштен, вара шке колхозыштыжо счетовод лийын.

1949-1953 ийлаште Марий кугыжаныш педагогический инситутын историко-филологический факультетыштыже тунемеш. Тунем пытарымеке, марий радиошто тырша, вара «Марий коммуна» газетын пашаеҥже лиеш. А 1971 ий гыч сулен налме канышыш лекмешкыже «Ончыко» журналыште ышта.

Эше студент улмыж годымак Марий книга издательствыште «Волгыдо рвезылык» (1953) лӱман почеламут сборникше савыкталтеш.

1956 ийыште самырык писатель-влакын III Всесоюзный совещанийыштышт участвоватла. Возымо мастарлыкшым аклен, Михаил Якимовым СССР Писатель ушем членыш пурташ темлат.

М. Якимовын кидше йымач у сборник-влак лектыт, марий композитор-влак денат пеҥгыде кылым куча. Тудын почеламутшо негызеш ятыр мотор муро возалтеш.

Михаил Иванович йоча-влакланат возен. Тудо «Шольым ден шӱжаремлан» (1971) почеламут сборникым, тыгак «Лышташ велеш» (1964) ойлымаш-влак книгам пӧлеклен.

1963 ийыште М. Якимов Г. Матюковский да Осмин Йыван дене пырля Эрик Сапаевын «Акпатыр» икымше марий опержылан мутым (либреттым) воза.

Поэт марий лудшылан чылаже 11 сборникым луктын. Ик кугу творческий сеҥымашыжлан почеламут дене возымо «Марий пеледыш» (1963) повестьше шотлалтеш.

 Тудын возымо мастарлыкшым аклен, СССР Госпремийын лауреатше Миклай Казаков ик статьяштыже тыге палемден: «Михаил Якимов моло мурызо коклаште палынак ойыртемалтеш: тудын йӱкшат йоҥгыдо, мутержат серыпле, геройжо-влакат шуарыме гай шӱм-чонан улыт. Тыге сераш поэтым илыш туныктен…»

Поэтым шарныме поро сомылым ий гыч ийыш Параньга районысо Матародо школысо тунемше да туныктышо-влак шуктен толыт. Поэтлан пӧлеклалтше «Якимов лудмаш» конкурс поро йӱлаш савырнен. Тиде лудмаш икымше гана 1999 ий январь тылзыште эртаралтын.

М. И. Якимов лӱмеш шарнымаш оҥам  Матародо школышто вераҥдыме.

«Марий краевед» клуб «Юбиляр-влакым саламлена» рубрикым почеш. Погынымашке поэтесса Валентина Михайдаровна Изиляновам, театровед Наталия Ивановна Кульбаевам ӱжынна.

Клубын вашлиймашкыже поэт, писатель, туныктышо, шымлызе, краевед, студент, тунемше-влакым вучена.

Пагален ужына!

Mari