«Марий краевед» клубын 116-ше погынымашыже эртыш

12.02.2019 | 555 просмотра(ов)

2019 ий 7 февральыште С. Г. Чавайн лӱмеш калыкле книгагудын краеведений пӧлкаштыже «Марий краевед» клубын 116-ше погынымашыже эртыш. Тудо марий поэт Михаил Иванович Якимовын 90 ияш лӱмгечыжлан пӧлеклалте.

Клубын вуйлатышыже Алексей Максимович Клёнов погынымашым почо, поэтесса Валентина Михайдаровна Изилянова ден театровед Наталия Ивановна Кульбаевам эртыше лӱмгечышт дене саламлыш. Марий Эл республикын тӱвыра, печать да калык-влакын пашашт шотышто министрын алмаштышыже Михаил Иванович Матвеев уна-влакым саламлыш, поэтын поро лӱмжым шарналтыш.

 

 

 

Михаил Якимовын шочмо ялже гыч туныктымо пашан ветеранже Эльвира Виссарионовна Захарова поэтын илыш корныжо да творчествыж нерген презентацийым ончыктыш. 14-ше гимназийыште тунемше Егор Фёдоров ден МарГУ-н студенткыже Екатерина Алгаева Михаил Якимовын сылне почелмутшо-влакым йоҥгалтарышт. Мурызо Раисия Михайловна Данилова музыкчо Сергей Пчёлкинын гармонь шоктымыж почеш Михаил Якимовын почеламутшылан возымо икмыняр мурым йоҥгалтарыш.

Михаил Ивановичым порын шарналташ родо-тукымжо, пырля пашам ыштыше йолташыже-влак толыныт. Шочмо ялыштыже поэтлан стелым почаш кумылан-влак поро шонымашыштым илышыш шыҥдараш кӱлмӧ нерген ойлышт.

Mari