«Марий краевед» клуб: Алексей (Алеко) Михайлович Юзыкайнлан – 75 ий

03.05.2018 | 67 просмотра(ов)

2018 ий 26 апрельыште 15 шагатлан С. Г. Чавайн лӱмеш калыкле книгагудын краеведений пӧлкаштыже «Ямде лий» газет редакций дене пырля «Марий краевед» клубын черетан погынымашыже эртыш. Клубын 113-шо погынымашыже журналист, прозаик, мер пашаеҥ Алексей (Алеко) Михайлович Юзыкайнын 75 ияш лӱмгечылан пӧлеклалтын.

Тачысе марий интеллигент-влак ятырынже, йоча жапым шарнен, «Ямде лий» газет редакций вуйлатыше Алексей Михайлович Юзыкайнын лӱмжым пагален пелештат. Тыгай шарнымаш лӱмлӧ йолташна-влакын: Геннадий Леонидович Сабанцев-Оярын, Геннадий Филимонович Гордеевын, Юрий Валентинович Исаковын, Олег Геннадьевич Иркабаевын, Юрий Ильич Соловьёвын, Зоя Михайловна Дудинан, Гельсий Зайниевич Зайниевын, Мария Байрамовна Матукован – да молынат чоныштышт ила.

Алексей Михайловичым порын шарналташ родо-тукымжо, йолташыже, тунемшыже-влак чумыргеныт. Эргыже Эрик Алексеевич Юзыкайн презентацийым ончыктен, краеведений пӧлкан пашаеҥже-влак книга ончерым чумыреныт.

Алексей Михайлович эреак кожмак, самырык шӱм-чонан, илышлан куаныше лийын. Тудын ушан-шотан шомакше, кумда шинчаончалтышыже, тӱняумылымашыже эре тунемаш, ончыл радамыште шогаш, объективный да принципиальный лияш туныктен.

 

Mari