«Марий краевед»

05.02.2018 | 333 просмотра(ов)

1-ше февральыште С. Г. Чавайн лӱмеш книгагудын краеведений пӧлкаже пелен пашам ыштыше «Марий краевед» клуб шкенжын 30 ияш лӱмгечыжым палемдыш. Ты гана тудын 113-ше погынымашыже эртыш.

Клуб ийлан ныл-вич гана погына. Тушко шанчызе, туныктышо, журналист, моло творческий еҥ кумылын погынат. Историй, илыш дене кылдалтше пӱсӧ йодыш-влакым каҥашат. М. Янтемир, К. Васин, М. Сергеев, М. Исиметов, Г. Левенштейн да моло лӱмлӧ краеведын тӱҥалме пашаштым шуйышо клубым 30 ий историй науко доктор Ксенофонт Никанорович Сануков вуйлата.

«Марий краевед» клубын лӱмгечыжлан пӧлеклалтше погынымашке шагалын огыл уна чумыргеныт. Лӱмгече дене саламлыше-влак коклаште Марий Элысе тӱвыра, печать да калык-влакын пашашт шотышто министрын алмаштышыже Александр Михайлович Одинцов, Т. Е. Евсеев лӱмеш национальный тоштерын директоржо Лидия Никаноровна Смирнова, И. С. Палантай лӱмеш тӱвыра да сымыктыш колледжын директоржо Алексей Максимович Клёнов, мер пашаеҥ Валерий Александрович Мочаев да молат лийыныт.

Погынышо-влак клубын эртыме корныжым, кундемнан лӱмлӧ еҥыштым, оҥай вашлиймаш-влакым шарналтеныт, 2018 ийлан паша планым палемденыт. Ончыкылан темлымаш ятыр пурыш. Клуб умбакыжымат пашам ышташ тӱҥалеш да самырык-влакымат шке радамышкыже кумылаҥден шупшыл кертеш манын ӱшаныме шуэш.

Фотоальбом

Mari