Лӱмлӧ сӱретче дене вашлиймаш

22.02.2019 | 197 просмотра(ов)

Пургыж тылзын 21-ше кечынже С. Г. Чавайн лӱмеш калыкле книгагудын краеведений пӧлкаштыже «У старт. 55+» проект негызеш марий калыкын чолга эргыже, Россий Федерацийын сулло сӱретчыже, Марий ССР-ын сулло сымыктыш пашаеҥже Иван Михайлович Ямбердов дене вашлиймаш эртен.

Книгагудын пашаенже-влак уста сӱретче нерген материалым поген, «Калыкын уста эргыже» лӱман книга ончерым чумыреныт.

Иван Михайловичын кажне сӱретше ойыртемалтше, шонаш таратыше, философий шӱлышан улыт. Тыглай гына ончен, сӱретын сюжетшым умылаш неле. Лач автор гына кажне пашажын шочмыж нерген оҥайын каласкален кертеш.

Толшо уна-влак сӱретчылан шуко йодышым пуэныт, нунылан вашлиймаш пеш келшен.

Мастар сӱретче Иван Михайловичлан пеш кугу таум ойлена, умбакыжат шуко у шонымашым да нуным илышыш шыҥдараш вийым, тазалыкым тыланена!

Mari