Книга пайрем

21.12.2017 | 231 просмотра(ов)

14 декабрьыште С. Г. Чавайн лӱмеш кугыжаныш книгагудын конференц-залыштыже книга пайрем эртыш. Тиде гана «Марий краевед» клубын погынымашыже 2017 ийыште лекше «Марий биографий энциклопедий» савыктышлан пӧлеклалте. Икымше энциклопедий 2007 ийыште лектын.  2017 ийыште ешарен лукмо энциклопедийыш 4905 лӱм пурен. Савыктышын авторжо да тӱҥ редакторжо - журналист, мер пашаеҥ, шымлызе, краевед Валерий Александрович Мочаев. Ответсвенный редакторжо – журналист Андрей Колесников.

Марий мландыште шочшо еҥ-влакын биографийыштым ончыктышо энциклопедий – пеш кугу паша. Автор ден тудын мобильный командыже ( А. Колесников, Т. Опарина, Н. Виногоров, Н. Яналова да молат) 1000 утла материалым ешарен погеныт.

Книга пайремыш шымлызе, краевед, музей, архив пашаеҥ, журналист, писатель, туныктышо-влак толыныт. Нуно Валерий Александрович Мочаевын пашажым кӱкшын акленыт. Мучашлан автор уна-влаклан автографан книгажым пӧлеклен.

Mari